O Colectivo Patrimonio dos Ancares vén de transcribir un documento do ano 1823 que fala dunha mámoa situada entre as parroquias de Quintá de Cancelada e Vilaiz. Chamou a atención porque todas as medorras do concello de Becerreá documentadas ata o presente atópanse, aproximadamente, nas inmediacións da estrada que vai do Cereixal ao Alto do Restelo.

O documento, bastante deteriorado e incompleto, non é moi preciso polo que buscaron nos Interrogatorios do Catastro de Ensenada e atoparon a referencia a unha mámoa que actuaba como marco. Buscando co LIDAR deron con ela. Atópase a uns 550 metros de altitude, no monte, segundo o catastro, coñecido como Peneigar, entre Casares (Vilaiz) e Balaxaz (Quintá), a uns 330 metros en liña recta do río Donsal. Trátase dunha medorra que semella estar en bastante bo estado de conservación, cunhas medidas aproximadas de 21 metros de diámetro. As coordenadas son: x: 656820 - y: 4753801.

Neste proceso tamén descubriron outra non lonxe de Castelmaría, se ben esta, ao estar nunha pradería adicada aos labores agrícolas perdeu case toda a súa masa tumular.

Más información: MÁMOAS E CASTROS DO CONCELLO DE BECERREÁ